Amabuye abereye ubukerarugendo muri Kirehe ( Amafoto)

Akarere ka Kirehe ni kamwe mu dufite ibice nyaburanga bitarabyazwa umusaruro, birimo imisozi iriho amabuye meza ndetse n’ibiyaga bitandukanye bitaratangira kubakwaho amahoteli cyangwa ibindi bikorwaremezo bijyanye n’ubukerarugendo.

Amabuye abereye ubukerarugendo muri Kirehe ( Amafoto)

Umunyamakuru wa IGIHE aherutse gusura bimwe muri ibi bikorwa byingajemo imisozi nyaburanga ifite amabuye meza ashobora kubyazwa umusaruro abantu bakaba bahasura, abandi bakurira imisozi yaho nkuko bikunze gukorwa mu bindi bice by’igihugu.

Aya mabuye agaragara mu Murenge wa Nyarubuye n’uwa Nasho ahagaragara imisozi ibereye ubukerrugend bushingiye ku kurira imisozi, moto zo mu misozi n’ibindi bikorwa bitandukanye umuntu ashobora gukorera mu misozi myiza yaho.

Iyo umuntu abashije kurira nibura umusozi umwe akagera hejuru aba yitegeye ibiyaga bitandukanye birimo nk’icya Nasho, ikiyaga cya Mpanga, ndetse n’ikiyaga cya Cyambwe byose bibarizwa muri aka Karere.

Hari umuturage umwe wabwiye IGIHE ko ayo mabuye bayifashisha mu bwubatsi andi ngo usanga ameze n’ibitare bakunze kuharuhukira, bakanahaganirira.

Ati “Urebye aya mabuye adufasha mu kuyubakisha inzu zacu, ntabwo twirirwa tujya kuyagura ahubwo ushaka abaturanyi bakaguha umusada mu kuyatunda.”

Umuyobozi w’Akarere ka Kirehe, Rangira Bruno, yavuze ko muri aka Karere bafite ibice byinshi bibereye ubukerarugendo birimo ikibaya cy’Akagera, imisozi ifite amabuye, amasumo ya Rusumo n’ibiyaga bitandukanye byose bitaratangira kubyazwa umusaruro nkuko bikwiriye gusa akizeza ko batangiye ibiganiro na RDB kugira ngo hakorwe inyigo bitangire kubyazwa umusaruro.

Ati “ Ubu turi mu biganiro na RDB kugira ngo idufashe mu kumenya icyakorwa , kumenya ishoramari rikenewe haba mu mahoteli, ibikorwa remezo bikenewe kugira ngo bihuze ibyo bikorwa nyaburanga.”

Meya Rangira yavuze ko nk’Akarere hari ibyo basanze bikenewe gukorwa haba mu rwego rwo gushyiraho amaresitora n’amahoteli mu rwego rwo kubyegereza ibiyaga bitandukanye ndetse n’imisozi imwe n’imwe ibereye ubukerarugendo.

Ati “Hari nk’abantu baba bashaka kurira imisozi bakoresheje imigozi, abatwara amagare na moto mu misozi n’abandi batandukanye, ubu turi mu gukora inyingo dukorana na RDB nyuma tuzareba ibyo twaheraho kandi mu myaka ya vuba turizera ko abakerarugendo bazatangira kuza kuhasura.”

Akarere ka Kirehe Kirehe kagizwe n’imirenge 12, irindwi muri yo ikaba ihana imbibi n’ibindi bihugu birimo Tanzania n’u Burundi, 90% by’abatuye aka Karere batunzwe n’ubuhinzi n’ubworozi.

Aya mabuye akunze kwifashishwa mu bwubatsi ariko yanakoreshwa mu bukerarugendo

Aya mabuye agaragarira neza abayareba witegeye imisozi myiza ya Kirehe

Abaturage bavuga ko iyi misozi yanakwifashishwa muri siporo zo kuzamuka imisozi

Aya mabuye arunze mu birundo ku buryo binogera ijisho ry'ubireba