Bombori bombori mu iyubakwa rya Canteen yo muri Village Urugwiro

Hambere aha mu 2000 ubwo Perezida Kagame yatangiraga kuyobora u Rwanda, yashatse gushyira ku murongo serivisi z’ibiro bye ’Perezidansi’ binyuze mu gushyiraho abajyanama, gushaka abayobozi bakuru n’abandi bazamufasha gushyira mu bikorwa inshingano ze.

Bombori bombori mu iyubakwa rya Canteen yo muri Village Urugwiro

Nk’uko bisanzwe, icyo gihe hashyizwe ku isoko imyanya y’abayobozi bakuru [Directors] n’abakuriye amashami runaka muri Perezidansi irapiganirwa ndetse abakozi batsinze ibizamini bahabwa akazi.

Nubwo igihugu cyari kigitangira kubyutsa umutwe nyuma y’imyaka itandatu gusa yari ishize Jenoside yakorewe Abatutsi ihagaritswe, Perezida Kagame yagaragaje ko ashaka gufata neza abakozi be. Mu kuborohereza kugera no kuva mu kazi, yasabye ko abayobozi bakuru, abajyanama n’abayobozi b’amashami bahabwa imodoka.

Icyo gihe ni bwo bwa mbere hatanzwe imodoka zanditse ku mazina y’umukozi agahabwa na pulake ye ya gisivili.

Muri uwo mujyo, Perezida Kagame yanasabye ko hashyirwaho kantine [Canteen] yo kuriramo n’isomero ryo gukoreramo ubushakashatsi. Wakwibaza aho Canteen mu Urugwiro byaturutse!

Umwe mu bakoraga mu Urugwiro icyo gihe, yabwiye IGIHE ko gushyiraho Canteen byaturutse ku gitekerezo cya Perezida Kagame nyuma yo kubona urujya n’uruza rwa saa sita na saa munani abakozi bagiye mu kiruhuko gufata ifunguro banagaruka mu Urugwiro mu kazi.

Iki kintu ngo cyamuteraga ikibazo bituma ahita atanga igitekerezo cy’uko habaho Canteen abakozi bazajya bariramo. Byasabaga kuyubaka kuko nta nyubako yabigenewe yari ihari.

Iryo soko ryo kubaka ryahawe Fair Construction isabwa kubaka Canteen n’isomero kuko ritabagaho. Fair Construction yanasabwe gushyira ibikoresho muri canteen yaba ibyo mu gikoni, ameza n’intebe z’abarimo gufungura.

Mu gihe cyo kubaka, hajemo ikibazo cya mbere, Rudasingwa Théogene wari Umuyobozi mu Biro bya Perezida wa Repubulika icyo gihe, yasabye Fair Construction kujya no kumwuzuriza inzu ye yari munsi ya RDB hanyuma igiciro cy’ibyakoreshejwe akagishyira ku byo yubakaga mu Urugwiro bikishyurirwa rimwe na Leta.

Rudasingwa ni we warekuraga amafaranga yo ku ngengo y’imari ya Perezidansi. Fair Construction yarabyanze Rudasingwa ararakara. Muri uko kurakara ni ho yahise acamo isoko kabiri yambura Fair Construction igice cyo kuzazana ibikoresho byo muri Canteen, isigarana icyo kubaka gusa.

Bivugwa ko Rudasingwa yahise yiga umushinga we w’uburyo azazana ibikoresho bya Canteen. Yashinze ikigo [company] gifite icyicaro i Nairobi muri Kenya, agiha isoko rya bya bikoresho, uretse ko we yazanye ibiciriritse bitari ku rwego rw’ibyo Fair Construction yeretse Umukuru w’Igihugu.

Yacunganye n’uko inzu yuzura, ahita atumiza bya bikoresho bye imodoka ya rukururana ya toni 32 itera amatako mu Urugwiro izanye ibikoresho. Amakuru avuga ko mu kubipakurura ngo bijye muri Canteen, byanze kwinjira mu muryango ni ko guhuruza uwubaka [Ingénieur] wa Fair Construction hutihuti amutegeka gusenya urukuta igihande kimwe n’umuryango kugira ngo ibikoresho byinjiremo hanyuma yongere ahubake.

Uwo Ingénieur bivugwa ko yitwaga Mupenzi. Yamuteye utwatsi yerekana ko mu bunyamwuga bidashobora gukunda. Rudasingwa yaratsimbaraye ashaka gukoresha igitugu n’ububasha yahabwaga n’umwanya we. Mu gihe bagihanahana umwe asaba gusenya undi abyanga, ngo Perezida yatungutse hirya, Rudasingwa amubonye agwa mu kantu.

Abakoraga mu Rugwiro icyo gihe bavuga ko Perezida yabajije iby’iyo kamyo mu Urugwiro, asobanurirwa na Rudasingwa ashaka kumubeshya ko ari bya bikoresho Fair Construction yazanye ariko Mupenzi aramunyomoza avuga ko iyo kamyo n’ibikoresho birimo ntaho bihuriye na Fair Construction. Ngo Perezida yasabye kumva neza ibyabaga. Umwe yavugaga ngo ni ibya Fair Construction uyihagarariye ati "Ashwi si ibyacu". Byarangiye Rudasingwa yemeye ko isoko barihaye ikindi kigo ari cyo cyabizanye.

Ngo Perezida akihava, Rudasingwa yahamagaye uwari Komiseri Mukuru wa Polisi icyo gihe, Frank Mugambage, ashaka kwihimura kuri Mupenzi wamutamaje imbere y’Umukuru w’Igihugu.

Ngo yasabye Mugambage gufunga Mupenzi, birakorwa ako kanya. Ariko mbere yo gufunga Mupenzi yabanje kubwira Shebuja witwa Mugisha [nyiri Fair Construction] ko bamufunze n’ibyo azize. Shebuja yatakambiye Perezida Kagame amusobanurira ibyabaye. Nyuma y’iminsi ibiri Mupenzi yararekuwe.

Hasabwe iperereza kuri bya bikoresho n’uburyo isoko ryatanzwe kugeza byinjiye mu Urugwiro. Hoherejwe umugenzacyaha muri Kenya, kureba icyo kigo cyohereje ibikoresho. Umugenzacyaha agarutse byaje kumenyekana ko ari ibya Rudasingwa, bivuze ko yashinze ikigo, agiha isoko ku biciro ashatse, agura ibikoresho ashatse, aba ari na we wiyishyura.

Ku babasha kwibuka cyane ni uko icyo gihe ikinyamakuru Umuseso cyamenyaga ibyo mu nda y’Ingoma cyanditse umutwe w’inkuru ugira uti "Kagame arubaka, Rudasingwa agasenya, Mupenzi agafungwa".

Rudasingwa yashakaga gukira vuba akoresheje amanyanga

Rudasingwa yabaye Ambasaderi w’u Rwanda muri Leta Zunze Ubumwe za Amerika n’Umuyobozi mu Biro bya Perezida wa Repubulika.

Abazi ibye neza bamwibukira ku buriganya mu iyubakwa ry’ibikorwa remezo bikomeye birimo na Hotel Intercontinental (Serena tubona ubu), icyo gihe ifaranga ryaratikiriye karahava abigizemo uruhare. Yari ageze ku kigero cyo kwandika imitungo ku bantu batari bo, byigeze no gutuma afungwa, acitse umunyururu, nawe ayabangira ingata.

Tito Rutaremara yigeze gutanga ikiganiro avuga ko FPR itangira Rudasingwa yari afite ishyaka rye ariko mu gutangira urugamba rwo kubohora igihugu, agakingurirwa amarembo muri FPR kimwe n’abandi bifuzaga kurwanira igihugu cyabo.

Ati “Baje rero turanababwira tuti nimunashaka kuko RPF yafunguye amarembo mwinjiremo, binjiramo barakora bagenda bashimwa bagera ku butegetsi. Ariko nk’ibyo ntibimubuza wawundi waje yari ameze atyo kuba agifite ako kantu, twe tukibwira ko yakize, yabaye nkatwe twese ariko ako kantu akigafite”.

Akomeza avuga ko ako kantu ko kutinjira muri FPR wese, kugira amanyanga yo gushaka gukira vuba ndetse no kugira undi umuri inyuma umubwira ngo burya wakora utya wabona ibi, ari byo byatumye Rudasingwa agaruka iyo yavuye.


Village Urugwiro ni imwe mu nyubako zubatse amateka akomeye mu Rwanda

Rudasingwa Théogene yakunze kuvugwa mu bikorwa byo kunyereza amafaranga y'imishinga ya leta