Hoteli 10 zihagarariye Karongi y’ubukerarugendo (Amafoto)

Akarere ka Karongi kamaze kugira umwihariko nka kamwe mu dukurura ba mukerarugendo batugana kubera ibyiza nyaburanga bigatatse.

Hoteli 10 zihagarariye Karongi y’ubukerarugendo (Amafoto)
Hoteli 10 zihagarariye Karongi y’ubukerarugendo (Amafoto)

Karongi iherereye mu Ntara y’Iburengerazuba yagukana ingoga ahanini bitewe no kuba ihana imbibi n’Ikiyaga cya Kivu kiyigabanya na Repubulika Iharanira Demokarasi ya Congo (RDC). Ibi byoroshya ubuhahirane n’abaturanyi.

Aka karere kagizwe n’ibice by’imisozi n’ibindi bice biberanye n’ubukerarugendo bitewe n’imiterere kamere yabyo, amateka n’akamaro bifite mu bukungu bw’igihugu.

Ugeze i Karongi akururwa n’ibyiza nyaburanga bitandukanye birimo Isunzu rya Congo-Nil, inkengero za Kivu, Gaz Methane, Ibigabiro bya Rwabugiri, Pariki ya Nyungwe, Icyayi cya Gisovu, Ishyamba kimeza rya Muciro, Urutare rwa Ndaba, n’Igiti cy’Imana y’Abagore.

Ibi byiza nyaburanga byiyongera kuri Kivu biri mu byazamuye amahirwe y’ishoramari i Karongi.

Ishoramari rizamuka mu Karere ka Karongi ryatumye n’ibikorwaremezo bikarimo byagurwa umunsi ku wundi. Ibi birimo umuhanda ukikiye Ikiyaga cya Kivu [Kivu Belt] ukanyuramo ndetse ukagahuza na Nyamasheke, Rutsiro na Rubavu.

Iri terambere kandi ntiryasize urwego rw’amahoteli kuko na rwo rwazamutse bwangu. Ibi bifasha abagatemberamo babona aho barambika umusaya habagwa ku nzoka.

Karongi iri mu bilometero 130 uvuye mu Mujyi wa Kigali. Iterambere ryayo ntiryasize urwego rw’ubukerarugendo bw’amahoteli kuko ubu kabarizwamo 14 yiganjemo ayubatse ku nkengero za Kivu.

Muri iyi nkuru, turagaruka kuri hoteli 10 zigezweho i Karongi ziri mu zihetse izindi muri aka karere kari ku buso bwa kilometero kare 993, bigabanyijemo imirenge 13, utugari 88 n’imidugudu 537.

-  Cleo Lake Kivu Hotel

Cleo Lake Kivu Hotel ni yo hotel ya mbere i Karongi, iherereye mu Murenge wa Bwishyura. Ni hoteli y’inyenyeri eshanu yubatse ku nkengero z’Ikiyaga cya Kivu, icya gatandatu mu bunini muri Afurika, kikaba icya 15 mu bujyakuzimu mu biyaga byose ku Isi. Iyi hoteli ifite ibyumba 10, kuyiraramo ijoro rimwe ni 200$ ku cyumba cya make.

Iyi hoteli ifite inyenyeri eshanu

Cleo Lake Kivu Hotel iri mu zigezweho i Karongi

Cleo Lake Kivu Hotel ifite ibyumba bigezweho

Cleo Lake Kivu Hotel yubatse neza ku Nkombe z'Ikiyaga cya Kivu

Hari na piscine igezweho

Icyumba cy'iyi hoteli kibereye ijisho no kuharara

Kurara muri iki cyumba ni 750$, akabakaba ibihumbi 750 Frw
-  Moriah Hill Resort

Iyi hoteli ifite inyenyeri enye yubatse ku Kivu, ikagira umwihariko w’uko icyumba cyose urimo uba witegeye ubwiza bw’iki kiyaga.

Moriah Hill Resort ifite ibyumba 19 by’abashyitsi n’icyumba cy’inama gifite ubushobozi bwo kwakira abantu 150.

-  Kivu Lodge Hotel

Iyi hoteli y’inyenyeri enye ifite ibyumba 21 by’abashyitsi n’icyumba kimwe cy’inama. Yubatse ku mwigimbakirwa (presqu’île) uri mu Murenge wa Gishyita mu Karere ka Karongi.


Hoteli nyinshi z'i Karongi ziri hafi y'Ikiyaga cya Kivu

-  Bethany Hotel

Bethany Hotel ni imwe mu yo muri aka karere yakira abantu benshi. Ni hoteli y’inyenyeri enye, ifite ibyumba 55 by’abashyitsi, ikagira ibyumba bine by’inama bifite ubushobozi bwo kwakira abantu 100 n’ibindi bibiri bifite ubushobozi bwo kwakira abantu 60 kimwe kimwe.


-  Golf Eden Rock Hotel

Iyi ni imwe mu mahoteli azwi cyane mu Karere ka Karongi kuko imaze imyaka myinshi. Ni hoteli y’inyenyeri ebyiri iri ku nkengero z’Ikiyaga cya Kivu. Ifite icyumba 116 by’abashyitsi n’ibyumba bitatu by’inama birimo igifite ubushobozi bwo kwakira abantu 300, icyakira abantu 30 n’igishobora kwakira 70.

-  Romantic Hotel

Ni hoteli iri ku Kiyaga cya Kivu, ifite ibyumba 35 by’abashyitsi, ikagira ibyumba bibiri by’inama birimo igifite ubushobozi bwo kwakira abantu 80 n’icyakira abantu 25.


-  Delta Resort Hotel

Ni hoteli y’inyenyeri eshatu iri muri metero nke uvuye ku Ngoro Ndangamurage y’Ibidukikije iri mu Mujyi wa Karongi. Ikora ku Kiyaga cya Kivu, ifite ibyumba 20 byakira abashyitsi.

-  Rwiza Village Resort

Ni hoteli y’inyenyeri eshatu yubatse mu buryo bwa Kinyarwana, iri ku nkombe z’Ikiyaga cya Kivu. Ifite ibyumba 10 by’abashyitsi ikagira na kimwe cy’inama gifite ubushobozi bwo kwakira abantu 20.


-  Home Saint Jean

Ni hoteli y’inyenyeri ebyiri yubatse hafi y’Ikiyaga cya Kivu. Ifite ibyumba by’abashyitsi 33 byakira abantu 65. Ifite ibyumba bibiri by’inama birimo icyakira abantu 110, n’igishobora kujyamo abantu 45.


-  Cormoran Lodge

Ni hoteli y’inyenyeri eshatu iri ku Kiyaga cya Kivu, ifite ibyumba birindwi by’abashyitsi bifite ubushobozi bwo kwakira abantu 10.

Kwamamaza