Huye: Bugarijwe n’indwara y’umuvuduko w’amaraso uri hejuru

Abaturage bo mu Karere ka Huye bagiriwe inama yo kwipimisha kenshi indwara zitandura zirimo diyabete, umuvuduko w’amaraso n’umutima kugira ngo bamenye uko ubuzima bwabo buhagaze ndetse n’abafite ikibazo cy’uburwayi babwivuze hakiri kare.

Huye: Bugarijwe n’indwara y’umuvuduko w’amaraso uri hejuru

Byavugiwe mu gikorwa cyateguwe n’Ibitaro bya Kaminuza bya Butare, CHUB, cyo gupima abantu bose babishaka indwara zitandura ku buntu, bagahabwa n’ubujyanama bitewe n’icyo ibipimo bigaragaje.

Icyo gikorwa cy’iminsi ibiri cyabaye ku matariki ya 10 na 11 Gicurasi 2022 mu Mujyi wa Huye aho Abaforomo bo kuri CHUB bateye ihema imbere y’Ibiro by’Umurenge wa Ngoma, bapima buri muntu ubyifuza indwara zitandura, batanga n’ubujyanama ndetse bamwe boherezwa kwa muganga kuvurwa.

Umuyobozi w’Ihuriro ry’Abaforomo n’Ababyaza kuri CHUB, Umurerwa Emerance, yavuze ko batekereje kwegera abaturage kugira ngo babagire inama z’ubuzima.

Yagize ati “Nk’abantu dushinzwe gutanga ubuzima kuri bagenzi bacu twaratekereje ngo n’ubwo tubakira kwa muganga bamaze kurwara, tubashije kujya tubasanga aho bari tukabagira inama tukabaganiriza bagafata ingamba hakiri kare ntibarware nk’uko tuvuga ngo kwirinda biruta kwivuza, byaba ari byiza cyane kurushaho.”

Muri iyo minsi ibiri hapimwe abantu 360 muri bo 100 basanganwa ikibazo cy’umuvuduko w’amaraso uri hejuru, abagera kuri 45 basanganywa isukari nyinshi ishobora gutera indwara ya diyabete.

Ibipimo byagaragaje ko hari benshi bagendana indwara y’umuvuduko w’amaraso uri hejuru n’isukari nyinshi mu mubiri batabizi kuko ababisanganywe bavuze ko batakekaga ko bafite ikibazo.

Abo bose bahawe ubujyanama bw’uko bakwiye kwitwara ndetse bandikirwa n’impapuro zibohereza ku bigo nderabuzima kugira ngo bavurwe, byaba ngombwa bakoherezwa ku bitaro by’akarere cyangwa ibya kaminuza.

Bamwe mu baturage bitabiriye iki gikorwa cyo kwimpimisha indwara zitandura ku buntu, babwiye IGIHE ko bacyishimiye kandi inama bagiriwe bagiye kuzikurikiza.

Munyaneza Celestin ati “Twabyishimiye kuko batwegereye hafi y’aho dukorera badufata ibipimo kandi batugira inama z’uko tugomba kwitwara kugira ngo twirinde indwara zitandura. Njyewe bangiriye inama yo kwimakaza imirire myiza nibanda ku mbuto n’imboga kandi nkakora siporo kenshi.”

Uwimbabazi Chantal na we yavuze ko nyuma yo gupimwa no kugirwa inama yafashe umwanzuro wo kujya yipimisha kenshi kugira ngo arebe uko ubuzima bwe buhagaze.

Ati “Muri iki gihe abantu bahugira mu gushaka amafaranga ntibite ku buzima bwabo, ntabwo nashoboraga kugira umuti umbwira ngo njye kwa muganga numva ntarwaye ariko bitewe n’inama nagiriwe nafashe icyemezo cyo kujya nkurikiza inama bangiriye kandi nkibuka no kujya kwisuzumisha kugira ndebe uko ubuzima bwanjye bwifashe.”

Umurerwa yagiriye inama abaturage ko muri rusange bakwiye kuvugurura imirire yabo bakibanda ku kurya imboga n’imbuto, bagakora imyitozo ngororamubiri kandi bakirinda guhangayika cyane.

Yabasabye kujya bibuka kwisuzumisa indwara zitandura ku mavuriro abegereye kandi buri wese agakurikiza inama agiriwe na muganga.

Yavuze ko n’abo bazajya bakomeza kwegera abaturage mu bice bitandukanye kugira ngo babaganirize babagire inama z’ubuzima.


Umuyobozi w’Ihuriro ry’Abaforomo n’Ababyaza kuri CHUB, Umurerwa Emerance, yasabye abantu kwitabira kwipimisha indwara zitandura kuko ziri guhitana abantu benshi

Biyemeje gukurikiza inama bagiriwe zijyanye no kwita ku buzima bwabo

Bamwe mu baturage bitabiriye iki gikorwa cyo kwimpimisha indwara zitandura ku buntu, babwiye IGIHE ko bacyishimiye kandi inama bagiriwe bagiye kuzikurikiza

Abaturage bo mu Karere ka Huye bapimwe indwara zitandura ku buntu

Abaforomo bo kuri CHUB bateye ihema mu mujyi wa Huye bapima abantu indwara zitandura