Imyaka 28 irashize, abavutse nyuma ya Jenoside babona bate ahazaza h’u Rwanda?

Ijoro ribara uwariraye! Mu gitondo cyo kuwa 7 Mata 1994, amarira n’agahinda byatashye mu Rwanda ubwo Jenoside yakorewe Abatutsi yatangiraga gushyirwa mu bikorwa mu buryo bweruye, ishyigikiwe na Leta yariho icyo gihe, ari nayo yari imaze igihe kinini iyitegura.

Imyaka 28 irashize, abavutse nyuma ya Jenoside babona bate ahazaza h’u Rwanda?

Ku bayirokotse, biragoye gusobanura ibihe bikomeye banyuzemo, byatwaye ubuzima bw’abarenga miliyoni, abandi benshi bagasigarana ibikomere bikomeye yaba inyuma ku mubiri ndetse no mu bitekerezo.

Nyuma y’imyaka 28, ibintu byarahindutse mu gihugu. Uretse kuba iterambere ryarageze ku Banyarwanda benshi, hari na benshi bavutse ariko batabaye muri ayo mateka ya Jenoside yakorewe Abatutsi, kuri ubu bakaba ari bo Rwanda rw’Ejo, ari narwo rutezwe amaso mu gusigasira ibyagezweho no kurushaho guteza imbere igihugu.

Ku rwego mpuzamahanga, u Rwanda rufite izina rikomeye mbere na mbere nk’igihugu cyanyuze mu mateka akomeye cyane ya Jenoside yakorewe Abatutsi, ariko nanone rukaba igihugu cyabashije kwiteza imbere mu buryo buhambaye kandi mu gihe gito.

Ibyo bituma u Rwanda ruhora mu mboni z’abantu hirya no hino ku Isi, ndetse abatarwifuriza ineza bakarutega iminsi mu buryo butandukanye, harimo n’abibaza niba ibyagezweho bizaramba ndetse bigakomeza kwiyongera mu myaka myinshi iri imbere.

Kuri ubu haracyari ababyeyi n’abayobozi bagize uruhare mu guhagarika Jenoside no gutangiza urugendo rw’iterambere ry’u Rwanda, ariko uko imyaka yicuma, birumvikana ko abakiri bato bagenda barushaho guhabwa inshingano, ari nabo bazasigarana igihango cyo gukomeza kubaka u Rwanda mu myaka iri mbere.

Ni inshingano itoroshye nk’uko byumvikana, uretse ko igihugu cyakoze iyo bwabaga kigatanga ibyo gifite kugira ngo urwo Rwanda rw’Ejo rubona iby’ibanze nk’uburezi n’ubuzima buzira umuze, bizarufasha mu kubaka ubushobozi bwo kurugeza ku ntego z’iterambere rwihaye zikubiye muri ‘Vision 2050.’

Hejuru y’ibyo kandi uru rubyiruko runafite inshingano ikomeye yo kurwanya ko Jenoside yakongera kuba mu Rwanda, ibyo bigahera mu kurandura ingengabitekerezo yayo, igikorwa bigaragara ko kizatwara imyaka myinshi kuko iyi ngengabitekerezo ikigaragaza henshi ndetse no mu rubyiruko by’umwihariko, ari nacyo giteye impungenge.

Muri iki gihe cyo kwibuka, IGIHE yatembereye hirya no hino iganira n’urubyiruko, kugira ngo tumenye neza uko rusobanukiwe izi nshingano zirutegereje, ndetse by’umwihariko n’uburyo rurimo kuzitegura.

Kwizera Adams ni umunyeshuri muri kaminuza w’imyaka 21. Yatubwiye ko Jenoside yakorewe Abatutsi yagize ingaruka zikomeye ku gihugu, ariko akavuga ko afite icyizere cy’iterambere rirambye mu gihe kiri imbere bitewe n’ibikorwa byakozwe na Leta birimo gutanga amahirwe angana kuri buri Munyarwanda.

Uyu musore yavuze ko uruhare rwe mu gusigasira ibyagezweho harimo kurushaho kwiga amateka y’igihugu ndetse no kurwanya ingengabitekerezo ya Jenoside.

Yagize ati “Uruhare rwanjye mu iterambere rushingiye ku kurwanya ingengabitekerezo n’abapfobya Jenoside yakorewe Abatutsi. Ni ukuvuga ngo mparanira kwimakaza ubumwe no kwirinda abapfobya n’abarema ingengabitekerezo ya Jenoside cyane abazibibamo urubyiruko binyuze ku mbuga nkoranyambaga ari naho urubyiruko rwinshi ruhurira.”


Kwizera Adams yavuze ko afite icyizere cy'iterambere ry'ahazaza h'u Rwanda
Kuri Ntarindwa Frank w’imyaka 23, yavuze ko ashimira uruhare rwa Leta y’Ubumwe mu kurandurana amacakubiri ndetse ashimira iterambere Abanyarwanda bamaze kugeraho, agashimangira ko uwashaka gusenya ibyagezweho bitamushobokera.

Yavuze ko imwe mu ngamba yo kwirinda ko Jenoside yazasubira ari “Ukumenya ko ubumuntu mu bantu ari cyo kintu cyagashyizwe imbere, hakabaho kwirinda gukwirakwiza urwango rushingiye ku moko.”


Ntarindwa Frank yavuze ko atewe ishema no kuba Leta yararanduye amacakubiri mu Banyarwanda
Umunyeshuri wiga Itangazamakuru, Ishema Edgard w’imyaka 23, yavuze ko icyizere cye cy’ahazaza gishingiye ku buyobozi bwiza bushyira umuturage imbere kandi bukareberera bose nta vangura.

Ati “Uruhare rwanjye mu iterambere ry’igihugu ni uguharanira ko ibyabaye bitazongera kandi nkabana n’abandi mu mahoro nk’uko Gahunda ya ‘Ndi Umunyarwanda’ ibisobanura.”


Ishema Edgard wiga Itangazamakuru yavuze ko urubyiruko rukwiriye guhagurukira kurwanya Jenoside yakorewe Abatutsi
Kuri rwiyemezamirimo Umukundwa Nadege w’imyaka 21, akaba ari n’umunyeshuri muri kaminuza, yavuze ko Jenoside yatumye imiryango imwe izimira indi ikabura abavandimwe, ariko akavuga ko urubyiruko rukwiye guhaguruka rukishakamo ibisubizo mu rwego rwo kubaka u Rwanda, ati “Ndashishikariza urubyiruko bagenzi banjye kwihatira kumenya amateka bayavuye imuzi kuko ntiwakumira icyo utazi.”


Rwiyemezamirimo Umukundwa Nadege akaba n'umunyeshuri muri kaminuza, yavuze ko urubyiruko rukwiriye guhaguruka rukiteza imbere
U Rwanda rw’ahazaza mu mboni z’abanyamahanga

Abanyamahanga baba mu Rwanda nabo bavuga ko utamenya uburemere bw’ibyabaye mu Rwanda utararugeramo, kandi banashima aho iki gihugu kigeze mu rugendo rwo gukira no kwiyubaka.

Babirye Jane ni umunyeshuri ukomoka muri Uganda akaba ari kwiga kaminuza mu Rwanda, aho ashimira intambwe igihugu kimaze gutera nyuma y’ibihe bikomeye cyanyuzemo, akavuga ko ari “igikorwa cy’indashyikirwa.”

Yagize ati “Urubyiruko rwo mu Rwanda rugomba guha agaciro ubuyobozi rufite. Nk’uko Bibiliya ivuga ngo ‘wubahe ababyeyi bawe kugira ngo iminsi yawe yo kurama ibe myinshi.’"

Uyu mukobwa yavuze ko u Rwanda rufite umugisha wo kugira umuyobozi nka Perezida Kagame, ashimangira ko urubyiruko rukwiriye kumwigiraho kugira ngo ruzakomeze umurage ari kubaka.


Babirye Jane yavuze ko u Rwanda rufite umugisha wo kugira ubuyobozi bwiza
Kuri Mutoni Cynthia ukomoka muri Repubulika Iharanira Demokarasi ya Congo, akaba afite imyaka 19, yavuze ko atiyumvisha uburyo umuntu ashobora guhakana Jenoside yakorewe Abatutsi kandi ibimenyetso byose bibyerekana, ati “Niba hari umuntu ugihakana ko Jenoside yabaye, Imana imugirire impuhwe kandi ndamusabira ngo abashe gukira.”

Yongeyeho ko “Dufite inshingano zo gushyigikira ababuze ababo no kwishyira mu mwanya wabo, dutanga ubufasha ku babukeneye ndetse tunabafasha gukira ibikomere bagize.”


Mutoni Cynthia yavuze ko bitumvikana kuba hakiriho abantu bahakana Jenoside yakorewe Abatutsi
Urubyiruko ni imbaraga z’igihugu nk’uko tubyumva kenshi, ariko kugira ngo rutange umusaruro, hari ibikwiriye gukorwa ku ruhande rwarwo ndetse no ku ruhande rw’igihugu. Ni ingenzi cyane ko urubyiruko rwigishwa amateka y’igihugu, ariko bikanaba ingenzi cyane ko narwo rugira ubushake bwo kuyamenya.

Ni ingenzi kandi gukoresha neza ubumenyi urubyiruko ruhabwa mu buzima bwa buri munsi, amahirwe ahari tukayubakiraho ndetse rukirinda ibirangaza bishobora gukoma mu nkokora iterambere ryarwo muri rusange.


Hagaragajwe ko urubyiruko rukwiye kwiga amateka y'u Rwanda kugira ngo urumuri rw'icyizere rwacanywe rutazazima

Urubyiruko ruvuga ko imiyoborere ishyira umuturage ku isonga itanga icyizere ku hazaza heza h'u Rwanda

Urubyiruko rufite icyizere cy'ahazaza bitewe n'uburyo Leta y'u Rwanda yabashije kubaka iterambere ryihuse kandi rikagera kuri bose nta vangura