Kaminuza zasabwe gushyira imbaraga mu masomo y’ikoranabuhanga ya ICDL

Kaminuza za Leta, izigenga n’amashuri makuru, byasabwe guha umwanya amasomo y’ikoranabuhanga atangwa n’Ikigo mpuzamahanga cy’Ikoranabunganga cya ICDL Africa.

Kaminuza zasabwe gushyira imbaraga mu masomo y’ikoranabuhanga ya ICDL

Aya ni amasomo y’ikoranahunga atangwa na ICDL Africa agahabwa abanyeshuri bo muri kaminuza n’ibigo bya Leta, aho bahabwa ubumenyi bw’ibanze mu gukoresha ibikoresho by’ikoranabuhanga nka mudasobwa n’ibindi.

Aya masomo atangwa binyuze mu bufatanye guverinoma y’u Rwanda yagiranye na ICDL Africa mu 2015, bugamije kuzamura ubushobozi bw’Abanyarwanda muri rusange ku bijyanye n’imikoreshereze y’ikoranabuhanga.

Abarangije aya masomo bahabwa impamyabushobozi zemewe ku rwego mpuzamahanga ku buryo aho bajya hose ku Isi badasabwa gukora ikizamini cy’ikoranabuhanga.

Muri aya masezerano kandi hari hakubiyemo ko ICDL Africa izafasha guverinoma gushyiraho umurongo wa Politiki ngenderwaho, ku buryo abakozi bose ba Leta n’abaturage bose muri rusange bazamuka bakava kuri 3,3% mu bantu bazi gukoresha ikoranabuhanga mu Rwanda bakagera kuri 50% mu mwaka 2018.

Hari kaminuza zatangiye gutanga aya masomo y’ikoranabuhanga ariko hari n’izindi zitabyitabiriye, bishobora kuba bitiza umurindi icyuho kiri mu banyeshuri barangiza kaminuza badafite ubumenyi buhagije mu ikorabuhanga.

70% by’imirimo iri ku isoko mu Rwanda isaba kuba ufite ubumenyi buhagije mu bijyanye n’ikoranabuhanga kandi usobanukiwe neza no gukoresha mudasobwa.

Umukozi muri Minisiteri y’Ikoranabuhanga na Inovasiyo, Ruhashya Rodrigue, yavuze ko bidakwiye ko abanyeshuri barangiza badafite ubumemyi buhagije mu ikoranabuhanga kandi guverinoma yarashyizemo imbaraga zihagije.

Ati “Guverinoma yashyize imbaraga mu kuzamura ikoranabuhanga hanashyirwaho ibyangombwa byose, ikibazo cyo kubura ubumenyi mu ikoranabuhanga kizakemurwa n’ibisubizo by’ikoranabuhanga.”

Yakomeje avuga ko guverinoma ifite gahunda y’uko mu 2024, 60% by’abaturage bakuze bazaba bafite ubumenyi mu ikoranabuhanga, urubyiruko rwo rukazaba ruri ku 100%.

Ruhashya yaboneyeho umwanya wo gusaba abigisha abanyeshuri gushyira imbaraga mu masomoya ICDL bizafasha abarangiza kwinjirana ubumenyi buhagije ku isoko ry’umurimo.

Ati “Turashishikariza amashuri makuru na kaminuza yaba iza Leta n’izigenga kwigisha abanyeshuri amasomo ahagije y’ikoranabuhanga, bizabafasha kujya ku isoko ry’umurimo bafite umusanzu batanga.”

Umunyamabanga wa Leta muri Minisiteri y’Uburezi ushinzwe Ikoranabuhanga, Imyuga n’Ubumenyigiro, Irere Claudette, yagaragaje ko hakiri abanyeshuri barangiza kaminuza badafite ubumenyi mu ikoranabuhanga.

Ati “Uyu munsi mu 2022 turacyafite abarangiza kaminuza badashobora gukoresha ibikoresho by’ikoranabuhanga, inshingano ziri kubabigisha bakwiye kubaha ubumenyi nyabwo bakwiye.”

Yakomeje avuga ko amasomo ya ICDL akwiye gushyirwamo imbaraga nyinshi kuko agira uruhare runini mu kuzamura ubumenyi mu ikoranabuhanga.

Umuyobozi w’ibikorwa muri ICDL, Peter Maina Njagi, yavuze ko usanga hari abagera ku isoko ry’umurimo bagasabwa kongera gufata amasomo y’ikoranabuhanga ariko iyo wafashe ayo batanga uba ufite ubushobozi bwo gukomeza.

Ati “Bamwe bagera ku isoko ry’umurimo bagasubizwa mu mashuri kwiga ikoranabuhanga, dukwiye gushishoza tukamenya ko abari ku murimo bafite ubumenyi bw’ikoranabuhanga, ibyo nibyo dukora mu bumenyi dutanga muri ICDL.”

Umuyobozi w’Ihuriro rya Kaminuza zigenga unayobora UTB, Kabera Calixte, yavuze ko hari icyuho kigaragara mu banyeshuri barangiza kaminuza bajya ku isoko ry’umurimo badafite ubumenyi mu ikoranabuhanga.

Ati “Kubura ubumenyi mu ikoranabuhanga ni imbogamizi ikomeye ku isoko ry’umurimo, twakoze ubushakashatsi dusanga abanyeshuri bacu bafite icyuho nibwo twatangije gahunda ya ICDL skills kandi byatanze umusaruro.”

Yakomeje avuga ko muri UTB abanyeshuri 5,875 baharangije bahawe impamyabushobozi y’amasomo y’ikoranabuhanga kandi bafite ubwo bumenyi.


Mu kugabanya icyuho cy'abarangiza badafite ubumenyi bw'ikoranabuhanga kaminuza n'amashuri makuru byasabwe gushyira imbaraga mu masomo ya ICDL Africa