Kwisubiraho cyangwa amaco y’inda? Icyihishe inyuma yo kwibuka Jenoside yakorewe Abatutsi kwa Jambo Asbl

Bamwe mu bagize ‘Jambo Asbl’ baherutse kugaragara mu gikorwa bise ko aricyo kwibuka abazize Jenoside yakorewe Abatutsi, ariko kiza kugaragazwa nk’agashinyaguro bitewe n’uko abagize iri huriro basanzwe bagaragara mu bikorwa byo kuyipfobya .

Kwisubiraho cyangwa amaco y’inda? Icyihishe inyuma yo kwibuka Jenoside yakorewe Abatutsi kwa Jambo Asbl

Kuwa 7 Mata 2022 nibwo Gustave Mbonyumutwa, uri mu bagize Jambo asbl yashyize kuri Twitter ubutumwa bugaragaza ko bibutse Jenoside yakorewe Abatutsi ndetse ashyira hanze amafoto abagaragaza bari gushyira indabo ku Rwibutso rwubatswe mu Mujyi wa Charleroi mu Bubiligi.

Muri iki gikorwa Jambo asbl yari ifatanyije na ‘Igicumbi’, ishyirahamwe ry’abasebya u Rwanda bavuga ko ari ijwi ry’abarokotse Jenoside yakorewe Abatutsi barimo Basabose Philippe, Ben Rutabana wa RNC, Dada Gasirabo, Hosea Niyibizi, Uwibambe Léontine, Tabitha Gwiza, Louis Rugambage, Nkubana Louis, Jovin Bayingana n’abandi.

Uru rwibutso rwa Charleroi rwatashywe mu 2017, hagamijwe ko kwibuka Jenoside yakorewe Abatutsi ndetse n’abasirikare b’Ababiligi 10 bishwe muri icyo gihe.

Nubwo kwibuka ari gahunda isanzwe imenyerewe ku Banyarwanda n’inshuti z’u Rwanda baba mu gihugu cyangwa mu mahanga, ibyo aba bakoze bifatwa nk’agashinyaguro kuko ahanini basanzwe bamenyerewe mu mvugo zipfobya Jenoside yakorewe Abatutsi bagaragaza ko hari n’abandi bishwe ariko batibukwa.

Iri huriro nubwo rivuga ko ryemera Jenoside yakorewe Abatutsi, rivuga ko ritemera ko yateguwe ahubwo yatewe n’uko Abahutu barakajwe n’ihanurwa ry’indege ya Habyarimana bakica Abatutsi. Hejuru y’ibi bavuga ko hari na Jenoside yakorewe Abahutu ariko yo itibukwa.

Ibi bihabanye n’ukuri kuko Umuryango w’Abibumbye wemeje ko mu Rwanda habaye Jenoside imwe ifite imizi mu moko n’urwangano byagiye bibibwa mu Banyarwanda kuri Repubulika ya Mbere n’iya kabiri bikaza kugeza mu 1994 ubwo habaga Jenoside yakorewe Abatutsi.

Iyi myemerere y’abagize Jambo baherutse no kuyigaragaza mu kiganiro bashyize hanze kuwa 27 Mata 2022 bise “icyo kwibuka inzirakarengane”.

Ni ikiganiro cyitabiriwe n’Umuyobozi wa Jambo asbl, Mugabowindekwe Robert. Uyu mugabo ni umuhungu wa Lt Col Éphrem Rwabalinda wabaye Umujyanama w’Umugaba Mukuru w’Ingabo za Habyarimana.

Muri iki kiganiro Mugabowindekwe Robert yagaragaje ko hari abandi bantu benshi bapfuye batibukwa nk’uko bimeze ku Batutsi bishwe muri Jenoside mu 1994.

Kwisubiraho? Cyangwa ni ukuyobya uburari n’amaco y’inda

Iki gikorwa cya Jambo asbl hari abo cyashyize mu rujujo bumva ko abagize iri tsinda bashobora kuba bisubiye bakareka umugambi wabo wo gupfobya Jenoside yakorewe Abatutsi bamazemo igihe.

Ambasaderi w’u Rwanda mu Buholandi akaba n’umwe mu bakurikiranira hafi imyitwarire y’abagize Jambo Asbl, Amb Olivier Nduhungirehe yabwiye IGIHE ko ibyo iri huriro ryakoze ntaho bihuriye no kwisubiraho ko ahubwo ari uburyo bwo kuyobya uburari.

Ati “Kuvuga ngo bagiye gushyira indabo ku rwibutso rwa Jenoside yakorewe Abatutsi, babyanditseho ko ari Jenoside yakorewe Abatutsi hari abashobora kugira ngo wenda ngo bahindutse basigaye badapfobya kandi ntabwo aribyo, ni ukuyobya uburari kubera ko bo mbere na mbere bemera Jenoside ebyiri kandi no kwemera Jenoside ebyiri nabyo ni ugupfobya, mu itegeko ryacu rihana ipfobya birimo. Ibyo byatuma Abanyarwanda basobanukirwa ibya kiriya gikorwa bakoze.”

Uyu mugabo wanigeze kuba Ambasaderi w’u Rwanda mu Bubiligi, igihugu Jambo Asbl ikoreramo yakomeje avuga ko abagize iri tsinda barangwa n’amayeri ashobora kuyobya abantu.

Ati “Jambo Asbl ntabwo ari ubwa mbere ivuga ko yemera Jenoside yakorewe Abatutsi. Bafite gahunda bise Mpore aho bavuga bati mu kwezi kwa Kane tuzajya dufata icyumweru kimwe twibuke abanyepolitike bishwe, icya kabiri twibuke Jenoside yakorewe Abatutsi, hari n’abarokotse rwose babonaga bakabaha ubuhamya, icyumweru cya gatatu bakibuka noneho ngo abazize Jenoside yakorewe Abahutu.”

Yakomeje agira ati “Kuri bo ni ukuyobya uburari. Bakoresha Jenoside yakorewe Abatutsi mu kuyobya uburari. Wenda nk’abatazi amateka nk’abazungu bashobora kubyumva bakavuga bati ko mutubwira ko bapfobya kandi ejo ubundi baraje kwibuka Jenoside yakorewe Abatutsi.”

Ibi Amb Nduhungirehe abihuriyeho n’Umunyamabanga Nshingwabikorwa wa IBUKA, Ahishakiye Naphtal wabwiye IGIHE ko ibyakozwe na Jambo Asbl bikwiye kwamaganwa kuko ari ugushinyagura.

Ahishakiye yakomeje avuga ko bari gukorana na IBUKA-Belgique kugira ngo inzibutso ziri muri iki gihugu zitazongera gukoreshwa n’abagamije gushinyagura.

Ati “IBUKA-Belgique irabikurikirana izafatanya n’izindi nzego batange umurongo. Ubundi inzibutso nka ziriya icyo zimaze ni uko abantu bashobora kuzigeraho bakamenya koko amateka y’ukuri, bakibuka Jenoside yakorewe Abatutsi, bagaha agaciro abazize ndetse bakanabunamira. Biba bibabaje rero kubona abantu bajyayo byo kwikinira, bagamije gupfobya no kuyobya abantu.”

Amakuru IGIHE yahawe n’umwe mu bantu batuye mu Bubiligi ni uko ibyo Jambo Asbl yakoze ari uburyo bakoresha bwo kuyobya uburari ngo batitwa abahakanyi n’abapfobya Jenoside yakorewe Abatutsi.

Ngo ibi babyitwaza babeshya abanyamahanga, bashaka kubumvisha ko ibyo bavugwaho ari ukubabeshyera , ko baharanira ngo uburenganzira bw’ikiremwamuntu.


Umuyobozi wa Jambo asbl, Mugabowindekwe Robert ni umwe mu bagaragaye muri icyo gikorwa cy'urwiyerurutso