Mushake undi mubuza amahwemo: Yolande Makolo asubiza HRW ishinja u Rwanda gufunga inzererezi

Umuryango Human Rights Watch (HRW), uvuga ko uharanira uburenganzira bwa muntu wongeye kunenga u Rwanda, uvuga ko ubwo rugiye kwakira inama ya CHOGM, ruzafata rugafunga inzererezi n’abandi bafite imyitwarire idahwitse.

Mushake undi mubuza amahwemo: Yolande Makolo asubiza HRW ishinja u Rwanda gufunga inzererezi

Human Rights Watch ivuga ko iyo u Rwanda rugiye kwakira inama cyangwa ibikorwa binini rufunga inzererezi, abazunguzayi, abasabiriza n’indaya kugira ngo Umujyi wa Kigali, ugaragare ko usukuye kandi utekanye. Aba ngo bafungirwa mu bigo by’inzererezi n’ibindi binyurwamo by’akanya gato bizwi nka Transit Centers.

Ibi ngo bizanakorwa ubwo u Rwanda ruzaba rugiye kwakira inama ihuza abakuru b’ibihugu na za Guverinoma zikoresha Icyongereza izwi nka CHOGM izaba guhera tariki 20 Kamena 2022.

Umuvugizi wa Guverinoma, Yolande Makolo, abinyujije kuri Twitter, yasubije uyu muryango ko uba ushaka gutera ubwoba no gushaka abawupfukamira kandi ibyo bitabarizwa mu Rwanda.

Yagize ati "Human Rights Watch iba ishaka Abanyafurika bahindanye, bapfukamye, basabiriza. Ibyo twe ntitubikora hano. Mushake undi mubuza amahwemo".

Ni igisubizo cyasembuye amarangamutima ya benshi bavuga ko ’Iyi ari yo miterere ya Human Rights Watch kuva na kera. Kenneth Roth wamunzwe na ruswa [umuyobozi wayo] yaroze uyu muryango, bikaba bishoboka ko bitewe n’uko u Rwanda rudatanga ruswa, HRW yananiwe gukora neza".

Undi yavuze ko uyu muryango ukomeje kuba igikoresho cyo gukoloniza Abanyafurika mu buryo buziguye.

Si ubwa mbere Human Rights Watch ishinja u Rwanda gufungira abo bantu mu kigo kinyurwamo by’akanya gato cyizwi nko ‘Kwa Kabuga’ i Gikondo, bakabaho ubuzima bubi burimo gukubitwa n’ibindi.

Muri Nzeri umwaka ushize, u Rwanda rwavuze ko ari umugambi w’igihe kirekire wa Human Rights Watch ugamije guhungabanya ubukungu bw’u Rwanda, hagendewe ku birego bidafite ishingiro.

Icyo gihe Yolande Makolo abinyujije kuri Twitter yagize ati “Raporo ya Human Rights Watch ni uburyo bwacuzwe neza bugamije kwangiza urwego runaka rw’ubukungu bw’igihugu hitwajwe ibirego bihimbano. Ubwo bwangizi ntacyo buzageraho kuko ibyo birego atari ukuri".

Uyu muryango umaze imyaka ine uhagaritswe gukorera ku butaka bw’u Rwanda nyuma y’igihe kirekire utangaza amakuru y’abo wita ko bibasiwe cyangwa bagiriwe nabi na Leta, nyamara hakorwa iperereza rikagaragaza ko atari ko biri.

U Rwanda rujya guhagarika imikoranire na wo mu 2018, wari uherutse gusohora raporo wari wise ‘All Thieves Must Be Killed” [ugenekereje mu kinyarwanda ni “abajura bose bagomba kwicwa”], aho yavugaga ko hari abantu 37 bishwe n’abapolisi, abasirikare, Inkeragutabara cyangwa DASSO, mu turere twa Rubavu na Rutsiro.

Mu iperereza Komisiyo y’Igihugu Ishinzwe Uburenganzira bwa Muntu yahise ikora, yasanze abavugwaga ko bapfuye ari bazima ndetse bamwe mu babitswe barigaragaza.

Imikorere ya Human Rights Watch yakunze kunengwa n’abantu batandukanye, aho akenshi ifatwa nk’iba igamije kugaragaza byacitse aho bitari no kuba igikoresho mu nyungu za politiki.

Mu kiganiro Perezida Kagame yagiranye na TV 5 Monde cyagiye hanze ku wa 29 Gicurasi 2021, yavuze ko imiryango nka Human Rights Watch ifite ikibazo mu mikorere, kuko n’iyo isanze yarabeshye cyangwa yabeshywe igatangaza ibitari byo, itabikosora.

Yagize ati “Urugero mu 2017, iyo Human Rights Watch mwavuze, yavuze ko hari abantu benshi baburiwe irengero, bandika amazina bati aba mwarabishe, abantu barasakuza bati ni nde wishe abo bantu byagenze gute? Twakoze iperereza , bari abantu bagera kuri 11 bose twasanze ari bazima. Nta n’umwe twasanze yaraburiwe irengero, nta n’umwe twasanze yarapfuye."

Yakomeje agira ati “Twabajije Human Rigths Watch tuti ’ese byabagendekeye bite, mwaba mwaribeshye? Mwaba se mwarakoze amakosa?’ Bahisemo guceceka. Ni ukuvuga ngo bahitamo gushinja abandi ibyaha ariko ntabwo bashobora no guhagarara kubyo barega. Ni uko tubaho."

Ubwo u Rwanda rwangaga kuvugurura amasezerano yarwo y’imikoranire na Human Rights Watch, rwagaragaje ko ibikorwa by’uwo muryango nta burenganzira bwa muntu birengera ahubwo bifite impamvu zihishe za politiki.


U Rwanda rufite ibigo ngororamuco bizwi kandi bikora neza ku buryo ababinyuzemo bibagirira akamaro bagasubira mu buzima busanzwe bakubaka igihugu