Rubavu: Hatangiye gutuburirwa imbuto y’ibirayi yitezweho kongera umusaruro

Ubuyobozi bw’akarere ka Rubavu bwatangaje ko ikibazo cy’izamuka ry’igiciro cy’ibirayi kigiye kuba amateka nyuma yo kubona uburyo bwo kubona imbuto nziza kandi itubuka mu gihe iyo abahinzi bakoreshaga yavaga mu karere ka Burera.

Rubavu: Hatangiye gutuburirwa imbuto y’ibirayi yitezweho kongera umusaruro

Ibi bitangajwe nyuma yo gutaha ibikorwa byakozwe na Kiliziya Gaturika Diyosezi ya Nyundo mu murenge wa Busasamana birimo aho kwikorera imbuto z’ibirayi n’ifumbire ivuye mu ngurube.

Kanyesoko Pierre Celestin, Perezida w’abahinzi b’ibirayi mu murenge wa Busasamana yavuze ko kuba ibirayi bihenda byatewe no kubura imbuto bigatuma hahinga bake, yizeza umusaruro mwiza nyuma yo kubona imbuto nziza ikorewe iwabo.

Ati’’Ibirayi byarabuze kuko twabuze imbuto n’inyongeramusaruro ziza zitinze kandi zihenze bituma hahinga abahinzi bake, umusaruro uba muke bituma ibirayi bihenda kuba tubonye imbuto nziza hafi kuko twayikuraga Burera kandi itizewe. Bigiye kudufasha kuko ni iterambere ritugezeho, n’ibiciro bizagabanuka’’.

Umuyobozi wa Koperative y’abafashamyumvire mu buhinzi, Ntibitura Modeste yavuze ko ibura ry’imbuto nziza ariryo shingiro ry’izamuka ry’ibiciro by’ibirayi, atanga icyizere nyuma y’uko bagiye kujya bayibona hafi.

Ati’’Twari dufite ikibazo cy’ibura ry’imbuto, ibi bikorwa kuba bije kigiye gukemuka kuko bazatubura imbuto z’ibirayi zivemo uturayi duto. Bizagabanya igiciro kuko nk’ubu bahingiye rimwe barahomba bitewe nuko bakoresheje imbuto mbi itizewe. Natwe tugiye kubigisha gukoresha imbuto nziza ivuye hano’’.

Musenyeri wa Diyosezi Gaturika ya Nyundo, Mwumvaneza Anaclet yavuze ko uyu mushinga ugiye kujya ufasha abaturage kubona imbuto nziza y’ibirayi, abasaba kubyitabira.

Ati “Aka gace karera kuko hari imirima myiza yo gutuburiramo imyaka abaturage bakabona imbuto nziza y’ibirayi n’ibigori kuburyo abaturage bazajya babona imbuto z’indobanure, babone n’amatungo agezweho. Turasaba abaturage kwegera iyi mishinga kuko nibo ibereyeho kuko izi mbuto z’ibirayi nibo bazajya bazikoresha mu mirima yabo’’.

Meya wa Rubavu, Kambogo Ildephonse yavuze ko ikibazo cy’imbuto abahinzi bamaze igihe bataka kigiye gucyemuka.

Ati’’Bafite uburyo bwiza bwo gukora imbuto nziza y’ibirayi, bafite ubuhanga mubyo gutoranya imbuto nziza no kuyibika. Bigiye gusubiza ibibazo abaturage bagiye batugezaho ko bafite ikibazo cy’imbuto nziza ubu barashubijwe’’.

“Turasaba abahinzi b’ibirayi ko bakwegera Paruwasi ya Busasamana bakabona imbuto zihagije kugira ngo umusaruro wiyongere basagurire amasoko. Turabasaba kureba uko bajya bakora ifiriti igurishwa, tugasaba na Paruwasi kubafasha guhunika umusaruro kugira ngo ukomeze ugire agaciro ku isoko’’

Igihembwe cy’ihinga cya 2021 kubera imbuto yabonetse itinze kandi itizewe, byatumye umusaruro uba mwinshi ku isoko bitera igiciro kubanuka bituma uyu mwaka batinya guhinga ibirayi biba bike ariyo mvano y’izamuka ry’ibiciro.

Mu karere Rubavu ikiro kigeze ku mafaranga 350.

Iyi nyubako yo gutuburiramo imbuto y'ibirayi yitezweho gufasha abahinzi kongera umusaruro no kubona imbuto nziza

Musenyeri Mwumvaneza Anaclet avuga ko uyu mushinga ugiye kuzajya ufasha abaturage kubona imbuto nziza y’ibirayi abasaba kubyitabira kuko ari ibyabo

Meya wa Rubavu, Kambogo Ildephonse yavuze ko ikibazo cy’imbuto abahinzi bamaze igihe bataka kigiye gucyemuka.