Sgt Robert mu mikoranire na RNC ya Kayumba

Hagiye gushira imyaka ibiri Sergeant Maj Robert Kabera wahoze mu Ngabo z’u Rwanda ahunze ubutabera bw’u Rwanda akajya muri Uganda kubera icyaha cyo gusambanya umwana we akekwaho.

Sgt Robert mu mikoranire na RNC ya Kayumba

Nubwo uyu mugabo akomeje kugaragaza ko ari umwere ahubwo ashakishwa n’u Rwanda kubera impamvu za politike, abo mu muryango we ni bamwe mu bamushinja ndetse bakemeza ko yakoze icyaha cyo gusambanya umwana we.

Mu Ugushyingo 2020, Umuvandimwe wa Sgt. Maj. Robert Kabera yamusabye kwishyikiriza inzego z’ubutabera, akareka gukomeza gusiga isura mbi igihugu.

Umuryango we wavuze ko ibyo yatangaje ko ari gushakishwa ku zindi mpamvu atari ukuri, ahubwo ko ari “ibinyoma ari guhimba aharabika u Rwanda”.

Sadi Ngabo bahuje se yagize ati "Twe nk’abagize umuryango twamaganye twivuye inyuma ibikorwa bigayitse byo gusambanya umwana we, hanyuma agatoroka ubutabera abeshya ko Guverinoma y’u Rwanda iri kumuhiga ngo kuko ari uwo mu muryango wa Rwigema."

Yinjiye mu mikoranire na RNC ya Kayumba

Mu minsi ishize nibwo inzego z’umutekano za Uganda zataye muri yombi, Sgt Robert ndetse urugo rwe rurasakwa kuko byakekwaga ko ashobora kuba atunze imbunda binyuranyije n’amategeko.

Mu minsi mike uyu mugabo yamaze afunze na nyuma y’uko afunguwe, hagaragariye cyane imikoranire afitanye na RNC binyuze mu bayoboke bayo muri Uganda.

Umunsi uyu mugabo afungurwa yagaragaye mu mihanda y’i Kampala ari kumwe na Sulah Nuwamanya na Prossy Bonabaana bafatwa nk’abayoboke bakomeye ba RNC muri Uganda.

Mu minsi ishize bombi bamenyekanye cyane mu bikorwa bigambiriye guhungabanya umutekano w’u Rwanda no gushaka kuruhindanyiriza isura, binyuze mu muryango barashinze witwa Self-Worth Initiative.

Bagaragara kandi mu bikorwa byo gushaka abayoboke bajya mu mutwe w’iterabwoba wa RNC wa Kayumba Nyamwasa, ababyanze bakaregwa mu rwego rushinzwe iperereza rya gisirikare (CMI), bagashinjwa kuba intasi z’u Rwanda.

Sulah Nuwamanya na Prossy Bonabaana bagaragaye bifotozanya na Sgt Robert nyuma yo kurekurwa.

Amakuru IGIHE yahawe n’umwe mu bazi imikoranire ya Robert n’abo bantu, avuga ko no mu byo yari yafatiwe muri Uganda birimo.

Ati “Icyo yari yafatiwe kirazwi ni ukubera ko n’ubundi afitanye imikoranire n’abo mu mutwe wa RNC, kuba akomeza akabikora na nyuma y’aho yarekuriwe ibyo nta gitangaza kirimo kuko n’ubundi birazwi ko Robert ari uwo.”

Amakuru yizewe n’uko Sulah Nuwamanya na Prossy Bonabaana ari nabo bagize uruhare rukomeye mu irekurwa rya Sgt Robert binyuze mu bisigisigi by’abagikorana na Kayumba Nyamwasa bari mu nzego z’umutekano za Uganda.

Gen Muhoozi afite ubushake n’uko hari abamunaniza

Hashize iminsi Umugaba w’Ingabo za Uganda zirwanira ku butaka akaba n’Umuhungu wa Perezida w’iki gihugu, Lt Gen Muhoozi Kainerugaba, agaragaza ko ashaka guca burundu imikoranire yagiye igaragara mu nzego z’umutekano za Uganda na RNC ndetse iki gihugu giherutse kwirukana Robert Mukombozi usanzwe ari umuhuzabikorwa wa RNC muri Australia.

Uyu mutangamakuru yabwiye IGIHE ko kuba muri Uganda hakigaragara imikoranire y’inzego z’umutekano na RNC abantu badakwiye kubifata nko kunanirwa kwa Muhoozi cyangwa kutagira ubushake bwo gukemura ikibazo.

Ati “Ibya Uganda ntabwo ushobora kumenya ibyo aribyo, hari abantu baba bashobora gukora ibintu binyuranyije n’amategeko abandi bagakora ibindi hirya ku buryo ibyo Gen Muhoozi ashobora kuba yifuza ashaka ko binakorwa bidakorwa.”

“Ntabwo afite imbaraga zisesuye zo kuvuga ngo yabikumira, ntabwo dushidikanya ku bushake bwa bwa Muhoozi kandi ibyo avuga aba akomeje ahubwo icyo adafite ni ubushobozi bwo kubihagarika ako kanya.”

Yavuze ko ubu Uganda ihanganye n’ikibazo cy’abantu bari mu nzego z’umutekano bashaka guca imikoranire na RNC ariko abandi bakabaca inyuma bagakomeza kugaragara muri ibyo bikorwa no kubishyigikira.

Sgt. Maj. Kabera, ni umuhanzi wakoze indirimbo zitandukanye zirimo izamamaye mu myaka ishize nk’iyo yise “Impanda” n’izindi. Yagiye aririmba kandi izindi ndirimbo nyinshi zirata ubutwari bw’Ingabo z’u Rwanda dore ko ari n’umwe mu bari bagize itsinda ry’ingabo z’igihugu riririmba rizwi nka “Army Jazzy Band”.


Sgt Robert afatanye urunana na Sulah Nuwamanya na Prossy Bonabaana