Shampiyona ya Sitting Volleyball igiye gutangira

Mu mpera z’iki cyumweru, tariki ya 19 n’iya 20 Ugushyingo 2021, ni bwo hatangira Shampiyona ya Sitting Volleyball mu bagore n’abagabo, izakinwa mu byiciro bine kugeza muri Mata 2022.

Shampiyona ya Sitting Volleyball igiye gutangira

Iyi Shampiyona yaherukaga kuba mu 2019 mbere y’uko icyorezo cya COVID-19 kigera mu Rwanda mu mwaka ushize, mu bagore izakinwa n’amakipe y’uturere 14 kongeraho UR Nyagatare.

Muri ayo makipe y’uturere harimo Bugesera, Rulindo, Kamonyi, Ruhango, Nyanza, Nyamasheke, Rubavu, Ngororero, Musanze, Gicumbi, Nyabihu, Rwamagana, Kayonza na Ngoma.

Mu bagabo, izitabirwa n’amakipe y’uturere 25 wongeyeho amakipe atanu ya UR Huye, UR Rusizi, UR Busogo, UR Rukara na UR Nyagatare.

Amakipe y’uturere ni iya Gasabo, Kicukiro, Rulindo, Kamonyi, Ruhango, Nyanza, Gisagara, Nyamagabe, Nyaruguru, Karongo, Rutsiro, Nyamasheke, Rusizi, Ngororero, Rubavu, Musanze, Burera, Gicumbi, Nyabihu, Rwamagana, Kayonza, Ngoma, Kirehe, Nyagatare na Gatsibo.

Iyi Shampiyona izatangira ikinwa muri ‘Ligue’ eshanu, aho mu cyiciro cya mbere, amakipe aba agabanyije mu byiciro bitandukanye, ari kumwe agahura hagati yayo.

Mu cyiciro cya kabiri na bwo amakipe azongera ahure muri ‘Ligue’, mu cyiciro cya gatatu hakinwe ½, aho buri Ligue itanga amakipe abiri ya mbere ubwo akaba amakipe 10, nayo akazahura yose muri ½.

Mu cyiciro cya kane, ya makipe 10 yakinnye ½ (mini Shampiyona) azahita atondekwa , atanu ya mbere akaba ari yo azakina Shampiyona nto, ibonye amanota menshi (iya mbere) ikaba ari yo izegukana igikombe.

Biteganyijwe ko iyi Shampiyona izasorezwa mu Karere ka Gisagara ku wa 20 Mata 2022.

Amakipe 30 y'abagabo arimo 25 y'uturere ni yo azakina Shampiyona ya Sitting Volleyball
Mu bagore, Shampiyona izakinwa n'amakipe 15 arimo 14 y'uturere