Umucunguzi w’umubano w’u Rwanda n’u Bufaransa: Ibidasanzwe kuri Emmanuel Macron watorewe indi manda

Abakurikiranye Politiki y’u Bufaransa ndetse na Emmanuel Macron by’umwihariko, bahamya ko yakuranye akayihayiho ko kuzavamo umunyapolitiki ukomeye.

Umucunguzi w’umubano w’u Rwanda n’u Bufaransa: Ibidasanzwe kuri Emmanuel Macron watorewe indi manda

Alain Minc wamukurikiranye akiri umwana ari no mu bajyanama be mu bya politiki, yigeze kuvuga umunsi wa mbere bahuraga mu myaka ya 2000.

Ati "Yaje kunsura, icyo gihe yari umugenzuzi mu by’imari akiri muto. Naramubajije nti ’mu myaka 20 uzaba ukora iki?’ Yaransubije ngo ’nzaba ndi Perezida!’ Byarantangaje cyane."

Nyuma y’imyaka 15 abwiye Minc ko azaba Perezida, yashinze ishyaka rishya muri politiki y’u Bufaransa, La Republique En Marche! ubwo yari Minisitiri w’Imari.

Kubera ubunararibonye buke n’ishyaka rishya, bamwe bafashe Macron nk’umwana utazi ibyo akora, nyamara yigaragaje ubwo yatsindaga Marine Le Pen mu 2017 n’amajwi 66% kuri 34%.

Yongeye kumusubira mu 2022 ku majwi 58,6% kuri 41,4% ya Le Pen, akora ibyaherukaga mu 2002, maze atorerwa manda ya kabiri yikurikiranya. Byananiye Nicolas Sarkozy na François Hollande.

Macron yatorewe manda ya kabiri, ibintu byananiye abaperezida babiri baheruka
Ubuto bwe buratangaje

Macron w’imyaka 44 yashakanye na Brigitte w’imyaka 69. Umubano wabo uratangaje uhereye ku buryo bamenyanyemo.

Macron yavukiye muri Amiens ku wa 21 Ukuboza 1977, ku babyeyi bombi b’abaganga, akaba umuhanga cyane.

Yamenyanya na Brigitte Trogneux amwigisha ibijyanye n’amakinamico (drama), icyo gihe yamurushaga imyaka 24.

Ubwo yarangizaga amashuri ku myaka 15, Macron yemeje ko yakunze mwarimu we Brigitte wari ufite imyaka 39 n’abana batatu, barimo umukobwa ungana na Macron ubwe.

Ku myaka 17, mbere yo kuva mu gace ka Amiens ngo ajye gukomeza amasomo i Paris, Macron yabwiye mwarimu we ko umunsi umwe azamurongora. Icyo gihe byasaga n’amashyengo.

Brigitte aheruka gutangaza ati "Twajyaga duhamagarana inshuro nyinshi tukamara umwanya munini kuri telefoni. Gahoro gahoro yagendaga avanaho ukwikanyiza kwanjye, mu buryo butangaje, kandi mu kwihangana."

Mu 2007, nyuma y’imyaka 14 bamenyanye, Macron yashyingiranywe na Trogneux wari umaze gutandukana n’umugabo we André-Louis Auzière babanye kuva mu 1974 – 2006.

Anne Fulda wanditse byinshi kuri Macron ngo yatangaje ko umuntu wabashije gutereka umugore wubatse, umurusha imyaka 24, "yirengagije uko ibintu bisanzwe bimera, amaso y’abantu no kumukwena, ashobora no kwigarurira u Bufaransa muri ubwo buryo."

Macron yari umwana ukerebutse kuva mu buto
Urugendo rwe muri politiki ntirusanzwe

Macron yakuze ari umuntu ukunda kwiyegereza abantu bakuru, ari nabwo yaje guhura na Jacques Attali, wari umuhanga mu by’ubukungu n’umujyanama wa Perezida François Mitterrand.

Bahuye mu 2004 arangije mu ishuri ENA (l’Ecole Nationale d’Administration), ryanyuzemo abayobozi benshi mu Bufaransa, banavuyemo ba perezida.

Yaje gushyirwa mu bugenzuzi bw’imari mu Bufaransa, aza no kugirwa umunyamabanga wungirije muri komisiyo yari ikuriwe na Attali, ishinzwe kwihutisha ubukungu bw’igihugu.

Macron yatangiye kuzamuka atyo, aza no gutangira gukora muri Rothschild & CIE Banque.

Muri icyo gihe abantu benshi batangiye kumubonamo ubushobozi bw’umuntu waba perezida.

Macron ntabwo yigeze ahatanira umwanya uwo ari wo wose binyuze mu matora, ngo nwenda abe yari amenyereye guhatana imbere y’abaturage.

Bitandukanye n’abamubanjirije nka Francois Hollande wiyamamarije ndetse agatorerwa kuyobora umujyi wa Tulle kuva mu 2001 - 2008, cyangwa Nicolas Sarkozy wabaye Meya wa Neuilly-sur-Seine kuva mu 1983 - 2002.

Macron yarihuse cyane, ku buryo aho yanyuze hose yabaga yashyizweho, aho kuba yahataniye uwo mwanya binyuze mu matora.

Muri Gicurasi 2012, Macron wari ufite imyaka 35 yagizwe Umunyamabanga Mukuru wungirije w’ibiro bya Perezida w’u Bufaransa, Palais de l’Elysée.

Nyuma y’imyaka ibiri, Macron w’imyaka 37 yabaye Minisitiri w’Imari w’u Bufaransa, wa mbere ukiri muto wari ubayeho, asimbuye Arnaud Montebourg.

Yazanye amavugurura menshi cyane cyane mu bijyanye n’umurimo no kuzamura ubukungu bw’igihugu, byatumye abasha kwigaruria amajwi y’abantu benshi.

Mu 2017 yatorewe kuyobora u Bufaransa, aba umuyobozi wa mbere muto mu mateka y’icyo gihugu.

Urukundo rwa Macron na Brigitte ntirusanzwe
Yashinze ishyaka mu buryo butangaje

Nka Minisitiri w’imari, Macron yabonaga neza ibibazo igihugu gifite, n’imwe mu miti ishoboka yagerageza kubikiza.

Muri Kanama 2016 yaje kwegura muri Guverinoma kugira ngo yite ku bikorwa byo kwiyamamariza kuyobora igihugu.

Nubwo yahoze mu ishyaka ry’aba-Socialiste kuva mu 2006-2009, Macron yabanje gushinga ishyaka ku wa 6 Mata 2016, aryita La République En Marche !, rikunda kwandikwa nka En March! gusa.

Ni ishyaka ryaje rishyira mu gaciro, bitandukanye n’amashyaka amenyerewe mu Bufaransa ashobora kubamo abahezanguni ku ngingo zimwe.

Ishyaka En Marche! Macron yarishinze mu buryo bwihariye, dore ko yabanje kuzenguruka mu bantu 25.000 hirya no hino mu gihugu, ababaza ibyo bumva bifuza muri politiki y’u Bufaransa n’ibyo barambiwe.

Ni umukandida waje agaragaza itandukaniro, dore ko yaje ari amaraso mashya benshi bamwiyumvamo nk’urubyiruko n’ishyaka rishya ridafite amateka mabi nk’ayagiye aranga andi mashyaka akuze cyane muri politiki y’u Bufaransa.

Brigitte afatwa nk'ishyiga ry'inyuma mu butegetsi bwa Macron
Yahiriwe n’akavuyo ko mu bakeba

Macron yatowe mu gihe abanyapolitiki bari bakomeye mu Bufaransa batari borohewe, barimo François Fillon wahabwaga amahirwe yo gutsinda amatora yashyirwaga hanze ko ubwo yari akiri umudepite, yahaye akazi ka baringa bamwe mu bagize umuryango barimo umugore we Penelope, maze ifaranga rya leta baririra ubuferi.

Ubushinjacyaha bukurikirana ibyaha by’imari bwahise butangira iperereza ku byaha byo kunyereza umutungo wa Leta, uwo wari umukandida w’ishyaka Les Republicains yahise ava mu nzira.

Ku wa 20 Kamena 2020 Fillon yakatiwe gufungwa imyaka itanu, harimo itatu y’igifungo gisubitse.

Muri icyo gihe François Hollandewari usanzwe ari perezida, yashinjwaga imiyoborere mibi ku buryo byageze aho afatwa nka perezida wanzwe n’abaturage kuva repubulika ya gatanu yatangira mu 1958 ku bwa Perezida Charles de Gaulle.

Mbere y’umwaka umwe ngo amatora abe, muri Mata 2016 abakora isesengura batangiye kwerekana ko aramutse yiyamamarije manda ya kabiri mu 2017, nta kabuza yatsindirwa mu cyiciro cya mbere.

Ku wa 1 Ukuboza 2016, Hollande yatangajeko ataziyamamariza manda ya kabiri.

Ibyo byahise bituma Macron arushahio kugwiza amahirwe, ndetse aza guhangana na Marine Le Pen amutsinda ku majwi 66.1%.

Ku myaka 39, Macron yabaye perezida wa mbere mu muto mu mateka y’u Bufaransa.

Ahubwo mu matora y’abadepite yabaye mu 2017, ishyaka La République En Marche (LREM) rya Macron ryanabonye ubwiganze mu nteko ishinga amategeko kandi ryari rimaze umwaka umwe gusa rivutse.

Ryifashishije iturufu yo kwiyegereza abanyapolitiki bari bariyomoye ku mashyaka y’aba-Socialiste n’aba-Republicains, kimwe n’andi mashyaka mato mato.

Byarangiye ribonye imyanya 308 mu mutwe w’abadepite, ihwanye na 53% by’abawugize.

Abasesenguzi ariko bagaragaza ko ukwezi kwa buki gushobora kudatinda kuri Emmanuel Macron, kuko amatora y’abagize inteko ishinga amategeko azaba ku wa 12 na 19 Kamena 2022, ashobora kutazamworohera.

Ni mu gihe Le Pen na we ashaka gushyira imbaraga mu matora y’abadepite ashakira imyaka ishyaka rye.

Ibyo ngo byatuma habaho ukwishyira hamwe kw’amashyaka (cohabitation), ku buryo wasanga perezida na Minisitiri w’intebe badakomoka mu ishyaka rimwe, ariko bakishyira hamwe ngo babone ubwiganze mu nteko ishinga amategeko.

Ibyo ngo byatuma Jean-Luc Melenchon w’ishyaka La France insoumise waje ku mwanya wa gatatu mu majwi y’amatora ya perezida, nawe ahanze amaso ayo matora, ndetse bivugwa ko ashaka no kuba Minisitiri w’Intebe.

Amaze guhindura byinshi

Mu myaka itanu ishize Macron ari ku butegetsi, yahanze imirimo, ashyiraho uburyo butandukanye bwo gufasha abakozi cyane cyane abahungabanyijwe na Covid-19.

Yashyizeho uburyo kandi bwo kwishingira ibikomoka kuri Gaz na peteroli kugira ngo ibiciro byabyo bidakomeza kuzamuka mu mezi atandatu ashize.

Icyakora aracyanengwa n’abari bamwitezeho impinduka kutabasha kuvugurura imikorere ya politiki y’amashyaka amaze igihe mu gihugu n’abakeneye impinduka bijyanye n’aho igihugu kigeze, ndetse no guhosha ibibazo byakunze kuvugwamo.

Mu bindi ashinjwa harimo kudashyira mu bikorwa ibyo yari yaremereye abaturage harimo amavugurura mu bukungu n’ubucuruzi.

Hari ibyemezo kandi yagiye afata akigera ku butegetsi byatumye rubanda rugufi batangira gutakaza icyizere kuko bibapyinagaza ari naho yakuye akabyiniriro ka ’Perezida w’abaherwe’.

Ibyo birimo nko kugabanya imisoro ku baherwe b’u Bufaransa.

Macron avuga ko yavukiye mu muryango uciriritse ku buryo yumva cyane ibibazo abantu batishoboye bahura nabyo.

Ku rundi ruhande, Macron yakoze byinshi birimo guhindura imibanire y’u Bufaransa n’amahanga, cyane cyane ku bihugu bya Afurika.

Bwagabanyije kwitwaza imbaraga bwakomeje gushinjwa ko zikomoka ku bukoloni, butangira gushyira imbere ubutwererane bufitiye inyungu impande zombi, nubwo nta byera ngo de!

U Bufaransa bwakomeje no gutungwa agatoki muri kudeta (coup d’etat) zimwe zimaze iminsi mu buregerazuba bwa Afurika.

Rumwe mu ngero rw’aho yigaragaje ni mu mubano n’u Rwanda.

Wazambye cyane nyuma ya Jenoside yakorewe Abatutsi, kugeza ubwo u Rwanda rwirukanye ambasaderi w’u Bufaransa.

Gusa ku bwa Macron umubano warazahutse, ndetse mu ruzinduko yagiriye i Kigau muri Gicurasi 2021 yasabye imbabazi ku ruhare rw’igihugu cye mu mateka yagejeje kuri Jenoside yakorewe Abatutsi mu 1994.

Macron yasabye imbabazi ku ruhare rw'u Bufaransa mu mateka yagejeje kuri Jenoside yakorewe Abatutsi
Perezida Paul Kagame aheruka kuvuga ko umubano umeze neza, nyuma y’imirimo yakozwe na komisiyo zashyizweho n’ibihugu byombi zigacukumbura ibyabaye mu Rwanda n’ababigizemo uruhare, zikemeza ko u Bufaransa rwabigizemo uruhare rudashidikanywaho.

Yagize ati "Hashingiwe kuri ibyo, icyiza Perezida Macron ntekereza ko aturuka mu kindi gice cy’imibereho muri kiriya gihugu, ntabwo yikoreye umutwaro uremereye nka bamwe mu banyapolitiki, nkeka ko byamufashije kugira uburyo bwihariye arebamo ibintu."

"Twarabyishimiye, dukorana na we, kugeza ubu umubano uragenda neza, turimo gutera intambwe nziza, twishimiye umubano dufitanye n’u Bufaransa."

Ni mu kiganiro yagejeje ku itsinda ryo muri Brown University mu cyumweru gishize, mu buryo bw’ikoranabuhanga.

Muri iki gihe kandi Macron agaragara nk’umwe mu bayobozi bafite imitekerereze mishya mu Burayi, kandi bashobora kugirirwa icyizere.

Icyo bigaragarira mu buryo yakomeje kuba intumwa y’u Burayi mu biganiro na Perezida w’u Burusiya, Vladimir Putin, hashakwa umuti ku ntambara u Burusiya bwatangije kuri Ukraine muri Gashyantare 2022.

Emmanuel Macron yongeye gutorerwa kuyobora u Bufaransa